Son günlər bəzi sosial şəbəkələrdə və qeyri-rəsmi informasiya resurslarında Siyəzən Rayon Kommunal Müəssisələr Kombinatının rəisi İlqar Xudaverdiyev barəsində yayılan əsassız, qərəzli və böhtan xarakterli məlumatlar cəmiyyətdə çaşqınlıq yaratmaq məqsədi daşıyır və dərin təəssüf doğurur. Açıq şəkildə bildirilir ki, bu cür yazılar reallıqdan uzaq, heç bir fakt və sübuta əsaslanmayan, məqsədli şəkildə bir ziyalını, dövlətə sadiq bir idarəçini gözdən salmağa yönəlmiş cəhdlərdir.

İlqar Xudaverdiyev uzun illərdir dövlətinə, xalqına və doğma rayonuna vicdanla xidmət edən, yüksək idarəçilik keyfiyyətləri və peşəkar fəaliyyəti ilə seçilən bir rəhbərdir. Onun rəhbərliyi altında Siyəzən rayonunda kommunal sahədə mühüm işlər görülmüş, şəhər və kənd yaşayış məntəqələrinin siması dəyişmiş, infrastruktur sahəsində ciddi nailiyyətlər əldə edilmişdir. İctimai yerlərin, küçə və yolların abadlaşdırılması, tullantıların vaxtında daşınması, yaşıllıqların salınması və qorunması, su-kanalizasiya sistemlərinin tənzimlənməsi kimi bir çox vacib xidmətlər İlqar müəllimin təşəbbüsü və gərgin əməyi sayəsində müasir tələblərə uyğun qurulmuşdur.

İlqar Xudaverdiyev öz fəaliyyətində şəffaflığı, ədaləti və dövlət qanunlarına hörməti hər zaman əsas prinsip kimi qəbul edir. O, Azərbaycan Respublikasının Prezidenti cənab İlham Əliyevin ölkədə həyata keçirdiyi sosial-iqtisadi inkişaf strategiyasına, xüsusilə regionların sosial rifahının yüksəldilməsinə, şəhər və kənd yerlərində infrastrukturun müasirləşdirilməsinə yönəlmiş siyasətinə sadiq bir məmur kimi fəaliyyətini davam etdirir. İlqar müəllim dəfələrlə çıxışlarında və ictimai tədbirlərdə Prezidentin rayona və bütövlükdə regionlara göstərdiyi qayğını yüksək qiymətləndirib, bu siyasətin həyata keçirilməsində öz töhfəsini verməyi qarşısına məqsəd qoyub.

Bundan əlavə, İlqar Xudaverdiyev sosial həssas qruplara – şəhid ailələrinə, qazilərə, müharibə veteranlarına, aztəminatlı və tənha insanlara xüsusi diqqət və qayğı ilə yanaşan bir insandır. Onun təşəbbüsü və dəstəyi ilə rayon ərazisində dəfələrlə xeyriyyə tədbirləri keçirilib, sosial problemlərin həlli istiqamətində real addımlar atılıb. İlqar müəllim daim vətəndaşlarla təmasda olur, onların qayğı və problemlərini dinləyir, onların arzu və təkliflərini diqqətlə nəzərdən keçirir və həlli üçün imkanlar daxilində tədbirlər görür.

Təəssüf ki, bəzi qərəzli şəxslər bu cür fədakar fəaliyyəti, xalqa xidmət missiyasını gözdən salmaq üçün əsassız ittihamlara və böhtan dolu kampaniyalara əl atırlar. Ancaq heç kəs unutmamalıdır ki, böhtanla həqiqəti ört-basdır etmək mümkün deyil. İlqar Xudaverdiyev və rəhbərlik etdiyi kollektiv hər zaman dövlətimizin qanunları çərçivəsində, vətəndaş məmnuniyyətini təmin etməyə yönəlmiş bir məqsədlə çalışıb və çalışacaq. Yayılan bu kimi əsassız iddiaların heç bir hüquqi və faktiki əsası yoxdur. Onlar yalnız şəxsi maraqlara və ya müxtəlif dairələrin qərəzli məqsədlərinə xidmət edən, cəmiyyətin sağlam inkişafına kölgə salmağa çalışan mənasız cəhdlərdir.

Bildiririk ki, belə böhtan xarakterli yazılarla bağlı hüquqi müstəvidə müvafiq addımlar atılacaq və hər bir əsassız ittihamın müəllifləri qanun qarşısında cavab verməli olacaqlar. İlqar Xudaverdiyev bu cür qaralama cəhdlərindən təsirlənmədən, Azərbaycan dövlətçiliyinə, xalqına və Prezident İlham Əliyevin həyata keçirdiyi inkişaf strategiyasına sadiq qalaraq fəaliyyətini daha əzmlə davam etdirəcək.

Unutmayaq ki, həqiqət var və həqiqət daim qalib gəlir! İlqar Xudaverdiyev kimi vicdanlı və ləyaqətli insanlar isə xalqın rəğbəti və dövlətin etimadı ilə daim yüksəlir və hörmət qazanır.