Qurban bayramı – mənəvi saflığın, paylaşmağın və mərhəmətin təntənəsidir. Bu mübarək bayram günlərində ehtiyac sahiblərinin yanında olmaq, şəhid ailələrinə, qazilərə və aztəminatlı ailələrə dəstək göstərmək, Allaha yaxın olmağın, Vətənə və insana bağlılığın ən gözəl nümunəsidir. Məhz bu ali dəyərləri həyat fəlsəfəsinə çevirmiş, öz fəaliyyəti ilə dövlətçilik yolunda fədakarlıq göstərən tanınmış iş adamı Hacı Əlimuxtar Bağırov, cəmiyyətimizdə böyük hörmət və nüfuz qazanmış şəxsiyyətlərdən biridir.

Uğurlu biznes fəaliyyəti ilə yanaşı, milli-mənəvi dəyərlərə dərin ehtiramla yanaşan Əlimuxtar Bağırov, sahibkarlıq dünyasında dürüstlük, ədalət və səmimiyyəti ilə seçilən bir simadır. O, illərdir ki, təkcə iqtisadi uğurlarla deyil, həm də sosial məsuliyyət layihələri ilə tanınır. Onun həyata keçirdiyi müxtəlif xeyriyyə təşəbbüsləri, ölkəmizin müxtəlif bölgələrində ehtiyac içində yaşayan ailələrə göstərdiyi dayanıqlı dəstək onun qəlbindəki mərhəmətin, imanının və insana dəyərin əyani sübutudur.

Qurban bayramı ərəfəsində hər il olduğu kimi bu il də Hacı Əlimuxtar Bağırovun təşəbbüsü və şəxsi nəzarəti ilə şəhid ailələrinə, qazilərə, müharibə veteranlarına, yaşlı və kimsəsiz insanlara qurban payları və ərzaq yardımları çatdırılmış, yüzlərlə ailə bu müqəddəs bayramda sevindirilmişdir. Onun məqsədi təkcə maddi yardım göstərmək deyil, həm də bu insanlara bir daha onların tək olmadıqlarını hiss etdirmək, dövlət və xalq tərəfindən daim dəyərləndirildiklərini göstərməkdir.

Əlimuxtar Bağırovun Vətənə olan bağlılığı, Prezident İlham Əliyevin həyata keçirdiyi siyasi və iqtisadi islahatlara səmimi dəstəyi onun fəaliyyətində özünü daim göstərir. O, ölkə başçısının çağırışlarına uyğun olaraq, sahibkarların sosial öhdəliklərini yerinə yetirmələrinin tərəfdarıdır və bu yolda özü də daim öndə gedir. Cənab Prezidentin “Sahibkarlıq iqtisadiyyatımızın aparıcı sütunudur” fikrini rəhbər tutan Hacı Əlimuxtar müəllim, daima milli iqtisadiyyata dəstək verməyi, yerli istehsalı gücləndirməyi və iş yerləri yaratmağı öz missiyası hesab edir.

Onun rəhbərlik etdiyi müəssisələrdə yüzlərlə insan çalışır, ailəsinə halal ruzi aparır. Əməkdaşlarına qarşı daim ədalətli, insani münasibət göstərən Hacı Əlimuxtar müəllim, eyni zamanda onların şəxsi problemlərinə də laqeyd qalmır, hər zaman dəstək olur.

Mənəvi dəyərlərə bağlı olan Hacı Əlimuxtar Bağırov, Qurban bayramı münasibətilə xalqımıza səmimi təbrik ünvanlayaraq bildirir:

"Qurban bayramı bizlərə mərhəməti, paylaşmağı, ehtiyac içində olanlara əl uzatmağı öyrədir. Bu müqəddəs gündə Allahdan Vətənimizə əmin-amanlıq, xalqımıza rifah, şəhidlərimizə rəhmət diləyirəm. Qoy bu bayram hər bir evə sevinc, bərəkət və sülh gətirsin. Bayramınız mübarək olsun!"

Hacı Əlimuxtar Bağırov kimi xeyirxah, vətənpərvər və dəyərlərə bağlı iş adamları cəmiyyətimiz üçün örnəkdir. Onun həyat yolu göstərir ki, sahibkarlıq təkcə maddi qazanc əldə etmək deyil, həm də xalqa xidmət etmək, dövlətin və millətin inkişafına töhfə verməkdir. Onun bu xidmətləri xalqın yaddaşında daim yaşayacaq və yeni nəsillər üçün əsl nümunə olacaqdır.