Azərbaycan musiqisinin tanınmış simalarından biri, xalqın sevimlisi, səsi və sənəti ilə ürəkləri fəth edən müğənni Əlikram Bayramov Ramazan Bayramı münasibətilə xalqımızı səmimi qəlbdən təbrik edib. O, bu mübarək bayramın insanlara sevgi, mərhəmət, birlik və xeyirxahlıq bəxş etdiyini vurğulayaraq, hər kəsə bol ruzi, sağlamlıq və firavanlıq arzulayıb.

Əlikram Bayramov təkcə səhnədə yox, real həyatda da xalqın içində olan, onların sevinci və kədəri ilə yaşayan, xüsusilə şəhid ailələrinə və qazilərə daim dəstək göstərən sənətkarlardandır. Onun adına xalq arasında böyük hörmət və sevgi var. Xüsusilə, şəhid övladlarının toy məclislərində təmənnasız çıxış etməsi, onları sevindirməsi, ailələrinə mənəvi dəstək olması onun necə böyük ürəyə sahib olduğunu göstərir. O, bu müqəddəs missiyanı öz insani və vətənpərvər borcu hesab edərək, şəhidlərin əmanətlərinə həmişə sahib çıxmağa çalışır.

Azərbaycan musiqisinin inkişafında özünəməxsus rolu olan Əlikram Bayramov, təkcə mükəmməl ifaları ilə deyil, həm də gözəl insani keyfiyyətləri, sadəliyi və xeyirxahlığı ilə milyonların qəlbində taxt qurub. Onun səmimi, duyğusal və ürəkdən gələn ifaları xalqımızın ən xoş anlarında, toylarında, bayramlarında səslənir. O, hər zaman Azərbaycan mədəniyyətinə, milli dəyərlərimizə və ənənələrimizə sahib çıxan sənətkar olaraq ölkəmizin musiqi tarixində xüsusi iz qoyub.

Ramazan Bayramı münasibətilə xalqımızı təbrik edən Əlikram Bayramov qeyd edib ki, bu müqəddəs bayram insanları daha da yaxınlaşdırır, mərhəmət və yardımlaşma duyğularını gücləndirir. O, Allahdan bütün vətən övladlarına sağlamlıq, ruzi-bərəkət və əmin-amanlıq arzulayaraq bildirib ki, Azərbaycan xalqı daim birlik və bərabərlik içində olmalıdır.

O, həmçinin Prezident İlham Əliyevin rəhbərliyi altında Azərbaycanın güclənməsi, şəhid ailələri və qazilərə göstərilən xüsusi diqqət və qayğını yüksək qiymətləndirdiyini, bu istiqamətdə atılan addımları ürəkdən dəstəklədiyini vurğulayıb.

Sonda Əlikram Bayramov bir daha xalqımızı Ramazan Bayramı münasibətilə təbrik edərək, bu müqəddəs bayramın hər evə bolluq, hər ailəyə sevinc və bərəkət gətirməsini diləyib. O, xalqımıza firavanlıq, xoş günlər və daima sevinc içində yaşamağı arzulayıb.

"Allah oruc və dualarınızı qəbul etsin! Bayramınız mübarək!"