Bəzən insan öz gördüyü işlə yox, yaratdığı dəyər ilə yadda qalır. Salyan rayonunun Şorsulu kənd bələdiyyəsinin sədri Elmar müəllim də məhz bu dəyərlərdən yoğrulmuş bir rəhbərdir. O, kreslo sahibi olmaq üçün deyil, kəndin qəlbinə yol tapmaq üçün bu yola çıxıb. Onun üçün rəhbərlik, imtiyaz deyil – məsuliyyətdir. Kağız üzərində yazılan səlahiyyət yox – hər gün xalq qarşısında verilən hesabatdır.

Elmar Xuduyevi digərlərindən fərqləndirən əsas cəhət onun kəndinə qarşı atalıq münasibətidir. O, Şorsulunu sadəcə yaşayış məskəni kimi yox, böyük bir ailə kimi görür. Bu ailənin hər üzvü onun üçün əzizdir – yaşlısı ilə hörmətlə davranır, gənci ilə yol yoldaşı olur, uşağına ümid gözü ilə baxır. Belə olmasa, heç bir rəhbər uzunömürlü ola bilməz.

Onu tanıyanlar yaxşı bilir – Elmar Xuduyevi kabinetdə çox az görmək olar. O, iş masasının arxasında əyləşməklə deyil, kəndin küçələrini addımlamaqla rəhbərliyini sübut edir. Bir gün kəndin su xəttinin yanında, bir gün məktəbin həyətində, başqa gün hansısa ailənin həyətində problemlə maraqlanarkən görmək mümkündür. Çünki o bilir: “Problemi yazışmalarla deyil, yerində görüb həll etməklə aradan qaldırmaq mümkündür.”

Şorsuluda yol çətinliyi olanda “bizlik deyil” deməyib – aidiyyəti qurumlarla danışıqlar aparıb, texnika cəlb edib. Su təchizatında fasilə yarananda “vaxtı gələndə baxarıq” deməyib – özü gedib yerində yoxlayıb. Hətta bəzən çətinlik yaşayan ailələrə öz hesabına kömək edib, amma bunu heç vaxt reklam etməyib. Çünki o yaxşı bilir: xeyirxahlıq göstərilər, sadalanmaz.

Onun ən böyük üstünlüklərindən biri insanları dinləməyi bacarmasıdır. Zaman-zaman kənd sakinləri onun yanına müxtəlif müraciətlərlə gəliblər. Elə hallar olub ki, bəzən problemin həlli mümkün olmayıb, amma onun verdiyi bir səmimi cavab, bir təsəlliverici söz insanlara güc verib. Bəzən rəhbər olmaq üçün sadəcə səlahiyyət yetmir – ürək də lazımdır. Elmar Xuduyevdə isə o ürək var.

Şorsulu kəndində bu gün aparılan abadlıq işləri təsadüfi deyil. Uşaq meydançalarının yaradılması, yolların təmiri, məişət tullantılarının düzgün idarə olunması, kəndin ekoloji təmizliyinin qorunması – bütün bunlar planlı işin göstəricisidir. İnsanların rahatlığı üçün gecə işıqlandırma sistemləri yenilənib, dinclik üçün məkanlar salınıb. Amma bunların arxasında rəsmi sənədlər yox – bir rəhbərin vicdanı dayanır.

Elmar Xuduyev üçün təkcə bu günə xidmət kifayət deyil – o həm də Şorsulunun gələcəyini düşünür. Uşaqlar üçün daha yaxşı təhsil şəraiti, gənclər üçün idman və asudə məkanları, ailələr üçün sosial layihələr – bütün bunlar onun masa üzərində deyil, zehnində hazır planlardır. Çünki o inanır: kəndin gələcəyi kağız üzərində deyil, uşaqların təbəssümündə yazılır.

Kənd sakinləri deyir: “Əvvəllər bələdiyyə sadəcə qeydiyyat üçün lazım idi, indi isə kəndin nəfəs aldığı yerdir.” Bu, rəhbər üçün ən böyük qiymətdir. Çünki xalqdan gələn hörmət bir dəfə qazanılar, amma ömürlük qalar. Göstərişlə sevgi qazanmaq olmur – sevgi xidmətlə, əməl ilə qazanılır.

Şorsuluda şəhid ailələri və qazilərə olan münasibət isə xüsusi qeyd olunmalıdır. Elmar Xuduyev bu insanlara sadəcə sosial status kimi yox, vətənin şərəf abidələri kimi yanaşır. Onların heç bir müraciətini cavabsız qoymur, bayramlarda qapılarında olur, dar gündə yanında. Çünki o yaxşı bilir ki, bu torpaq əgər bugün rahatdırsa, bu rahatlığın arxasında canından keçənlərin ruhu dayanır.

Belə rəhbərlərlə kəndlər oyandıqca, rayonlar dirçəlir, dövlət güclənir. Çünki ölkənin inkişafı yalnız mərkəzdə qəbul olunan qərarlarla deyil, kəndlərdə çalışan belə vicdanlı rəhbərlərlə mümkündür. Şorsulu kimi kəndlərin taleyi də məhz belə insanlara əmanət olunanda gələcəkdən narahat olmağa dəymir.

Bu gün Şorsulunun səsi daha inamlı, sabahı daha parlaq səslənir. Çünki kəndin ən çətin yükünü çiyninə alan Elmar Xuduyev kimi bir rəhbəri var. Və xalq inanır ki, bu yol davam edəcək. Çünki bu rəhbərin yolu yalnız vəzifə yolu deyil – vicdan yoludur.