Azərbaycan "Zəngəzur dəhlizi" vasitəsilə qısa zamanda Avrasiyanın nəqliyyat və logistika mərkəzi kimi mövqeyini gücləndirəcək

 
44 günlük Vətən müharibəsində əldə olunmuş qələbə ərazi bütövlüyümüzün bərpası ilə yanaşı, 30 ilə yaxındır ki, ayrı düşdüyümüz torpaqlara qovuşmamızı da təmin etdi. Erməni vandallarının vəhşiliyi nəticəsində yurdlarımız, rayon və kəndlərimiz tamamilə dağıdılıb, xarabalığa çevrilib. Amma bütün çətinliklərin öhdəsindən gəldiyi kimi Azərbaycan dövləti bu torpaqlarda yenidən bərpa, quruculuq işlərini də həyata keçirmək istiqamətində mühüm planlar həyata keçirməkdədir. Prezident İlham Əliyev tərəfindən həmin ərazilərdə ardıcıl, planlı və məqsədyönlü şəkildə böyük quruculuq, tikinti işlərinin aparılması tapşırığı verilib.
Xüsusi olaraq vurğulanmalıdır ki, müəyyən olunmuş milli prioritetlər ölkənin dayanaqlı inkişafını təmin edilməsində mühüm amillərdən sayılır. Bu ilin əvvəlində ölkə Prezidenti cənab İlham Əliyevin müvafiq Sərəncamı ilə təsdiq edilmiş "Azərbaycan 2030: sosial-iqtisadi inkişafa dair Milli Prioritetlər" gələcək onillikdəki inkişafımızın əsas istiqamətlərinə çevrilib. Qeyd edilməlidir ki, ötən 17 il ərzində Prezident İlham Əliyevin rəhbərliyi ilə aparılan uğurlu dövlət siyasəti Azərbaycanın dünyada sabit, təhlükəsiz və müasir həyat səviyyəsini təmin etmiş ölkə kimi tanınmasına yol açıb. İqtisadi inkişafdan qaynaqlanan yüksək maliyyə imkanlarının uzun illər makroiqtisadi sabitliyə və artıma mühüm töhfə verib, təhlükəsizliyin təmini üçün güclü potensial yaradıb. Bu mənada, “Azərbaycan 2030: sosial-iqtisadi inkişafa dair Milli Prioritetlər"də dayanıqlı artan rəqabətqabiliyyətli iqtisadiyyat, dinamik, inklüziv və sosial ədalətə əsaslanan cəmiyyət, rəqabətli insan kapitalı və müasir innovasiyalar məkanı, işğaldan azad olunmuş ərazilərə böyük qayıdış və təmiz ətraf mühit və “yaşıl artım” ölkəsi kimi hədəflər müəyyənləşdirilib. Qarşıdakı onillikdə həyata keçirilməsi nəzərdə tutulmuş bu proiritetlər ölkə vətəndaşlarının sosial rifahının yüksəldilməsi ilə yanaşı, daha güclü və qüdrətli Azərbaycanın yeni inkişaf mərhələsinə qədəm qoyacağını, müasir innovasiyalar məkanı, işğaldan azad olunmuş ərazilərə böyük qayıdışı, təmiz ətraf mühit və "yaşıl artımı" reallaşdıracağını deməyə əsas verir.
Eləcə də, Azərbaycan 44 günlük Vətən müharibəsində qazandığı qələbə ilə  regionda dayanıqlı sülh və təhlükəsizliyi təmin etmək arzusundadır, həmçinin, Şərq-Qərb, Şimal-Cənub, Şimal-Qərb nəqliyyat dəhlizləri kimi regional bağlantı layihələrinin icrasına mühüm töhfə verir. Azərbaycan ərazisindən Asiyanı Avropa ilə birləşdirən Şərq-Qərb dəhlizinin tərkib hissəsi olacaq "Zəngəzur nəqliyyat dəhlizi" üzərində çalışan Azərbaycan bu mühüm kommunikasiya xəttinin vasitəsilə qısa zamanda Avrasiyanın nəqliyyat və logistika mərkəzi kimi mövqeyini gücləndirəcək. Həyata keçirilən layihərə və regionda formalaşan əməkdaşlıq platformaları isə işğaldan azad edilmiş torpaqların bərpasının daha sürətli həyata keçirilməsini təmin edəcək.  Nəzərə alsaq ki, işğaldan azad olunmuş, Lüksemburqdan dörd dəfə böyük olan ərazidə müasir layihələr icra olunacaq və irimiqyaslı yenidənqurma işləri aparılacaq, "ağıllı şəhər", "ağıllı kənd" və "yaşıl enerji" konsepsiyalarından istifadə olunacaq, bu ölkəmiz üçün böyük siyasi-iqtisadi, sosial dividendlər vəd edir.
 
 
Məhəmməd Mehdiyev,
Salyan rayon Seyidan kənd ümumi orta məktəbin direktoru  

---

---